Këshilltari në Departamentin Amerikan të Shtetit, Derek Chollet, do të udhëtojë në Kosovë, Serbi, Bosnjë dhe Hercegovinë, Maqedoninë e Veriut, Mal të Zi, Kroaci dhe Belgjikë, së bashku me një delegacion ndërinstitucional nga data 11 dhjetor deri më 17 dhjetor. Kështu ka njoftuar Zyra për Media e Departamentit Amerikan të Shtetit.
“Kjo vizitë do të nënvizojë përkushtimin e qëndrueshëm të SHBA-së për paqen, stabilitetin dhe prosperitetin e rajonit”, shkruan në njoftim.
Kështu, më 12-13 dhjetor, këshilltari Chollet do të mbërrijë në Kosovë,ku do të takohet me zyrtarë qeveritarë dhe liderë të tjerë politikë, për të diskutuar bashkëpunimin e vazhdueshëm për një sërë çështjesh, duke përfshirë përpjekjet e SHBA-së për të avancuar integrimin e Kosovës në strukturat evropiane dhe euroatlantike.
Njoftimi i Depertamentit Amerikan të Shtetit
Në këtë rast, përfshihet tema e dialogut të lehtësuar nga BE-ja, për të arritur një marrëveshje gjithëpërfshirëse për normalizimin e marrëdhënieve ndërmjet Kosovës dhe Serbisë, me njohjen reciproke në qendër të marrëveshjes, raporton RTKlive.
“Më 13 dhjetor, këshilltari Chollet do të vazhdojë në Serbi, ku do të diskutojë për sigurinë energjetike, integrimin ekonomik rajonal dhe përparimin drejt objektivit të Serbisë për anëtarësim në BE me udhëheqjen e qeverisë serbe”, shkruan në njoftim.
“Ai do të diskutojë gjithashtu rolin e Serbisë në forcimin e paqes dhe sigurisë rajonale dhe angazhimin e saj të vazhdueshëm me dialogun e lehtësuar nga BE-ja, për të arritur normalizimin gjithëpërfshirës të marrëdhënieve me Kosovën”.
Pjesë nga deklarata e Departamentit Amerikan të Shtetit
Më 14 dhjetor, këshilltari Chollet do të udhëtojë në Bosnje dhe Hercegovinë dhe Maqedoninë e Veriut, kurse më 15 dhjetor, këshilltari Chollet do të udhëtojë në Maln e Zi e më pas në Kroaci.
Më pas, ai do të udhëtojë në Belgjikë nga 16-17 dhjetor për të diskutuar bashkëpunimin me partnerët evropianë për një sërë çështjesh globale, duke përfshirë mbështetjen e vazhdueshme për Ukrainën, rrugën e anëtarësimit në BE dhe integrimin evropian të vendeve të Ballkanit Perëndimor, sigurinë energjetike, dhe dialogun e ndërmjetësuar nga BE-ja ndërmjet Kosovës dhe Serbisë.
