Për presidentin amerikan, Joe Biden, me marrëveshjen për rritjen e tavanit të borxhit të miratuar nga Kongresi “askush nuk mori gjithçka që donte, por u shmang një krizë dhe një kolaps ekonomik”.
Ai e tha këtë duke folur nga Zyra Ovale e Shtëpisë së Bardhë. Presidenti theksoi se drita jeshile për marrëveshjen ishte “thelbësore”. Rezoluta do të nënshkruhet sot me 3 qershor. Kjo përfaqëson “lajm të mirë për qytetarët: ne kemi shmangur kolapsin e ekonomisë sonë,” përsëriti Biden.
“Ne shmangëm një krizë dhe falimentimin tonë të parë në histori. Do të kishte qenë e papërgjegjshme, ekonomia do të kishte rënë në recesion dhe tetë milionë vende pune do të kishin humbur”.
Më pas ai falënderoi edhe kryetarin republikan të Dhomës së Përfaqësuesve, Kevin McCarthy, që ka negociuar. “E vetmja mënyrë që Amerika mund të funksionojë është përmes kompromisit dhe konsensusit. Ne po investojmë në Amerikë, te amerikanët dhe në të ardhmen”./FrontOnline/