Zëvendëskryeministri i parë i Kosovës, nga radhët e Aleancës për Ardhmërinë e Kosovës, Besnik Tahiri, ka folur për mospajtimet me parterin e koalicionit, Lidhjen Demokratike të Kosovës, për dialogun me Serbinë.
Tahiri ka thënë në emisionin “Pressing”, në televizionin T7, se partia e Ramush Haradinajt është “kundër zbritjes së dialogut nga niveli i kryeministrit”.
“Jemi për që ai dialog të vazhdojë në nivel politik”, është shprehur ai.
Sipas Tahirit, dialogu “rrëshqet” nga ky nivel kur “fillon të trajtosh temë, temë, temë. Nuk ka temë teknike”.
I pyetur se a ka qenë AAK’ja e njoftuar paraprakisht për emërimin e Skender Hysenit koordinator për dialogun nga kryeministri Avdullah Hoti, Tahiri është përgjigjur: “Jo”.
“Kam diskutuar me kryeministrin Hoti. Nuk e befasojmë njëri-tjetrin. Ajo çështje është në diskrecion të kryeministrit”, ka thënë më tej Tahiri.
Megjithatë, sipas tij, ky emërim “është dashur të diskutohej paraprakisht, por nuk është fundi i botës”.
“Fundi i botës është rezultati. Aty e kemi problemin”, ka deklaruar Tahiri.
