×
  • Bota/Rajoni
  • Bota/Rajoni

    Begaj do më shumë njohje e liberalizim të vizave për Kosovën

    FrontOnline
    28 Nëntor 2022

    Në pritjen shtetërore të organizuar sot me rastin e 110-vjetorit të shpalljes së pavarësisë së Shqipërisë, Presidenti i Republikës, Bajram Begaj priti autoritete të larta të shtetit, përfaqësues të trupit diplomatik, përfaqësues të forcave politike, komuniteteve fetare, kulturës, artit dhe medias për të kremtuar së bashku festat kombëtare.

    Në fjalën e tij para të pranishmëve, Begaj u përkujdes që të përmendte historikun 110-vjeçar të Shqipërisë së pavarur.

    “28 nëntori, data që bën bashkë, me mendime e me zemër, çdo shqiptar dhe çdo mik të shqiptarëve. Kjo datë është mishërimi i sakrificës, gjakut dhe kontributit të paçmuar të atdhetarëve e heronjve tanë kombëtarë. Flamuri që nderojmë sot është vetë historia jonë; – histori e sakrificave më sublime për të mbrojtur, me çdo çmim e në çdo kohë, atdheun, gjuhën dhe identitetin tonë kombëtar. Sot festojmë 110 vite nga dita, kur patriotë dhe delegatë nga të gjitha trevat shqiptare, me përgjegjësi kombëtare dhe historike, njëzëri pagëzuan shtetin e ri shqiptar, atdheun që kemi sot. Ata kishin fe dhe formime të ndryshme, por të gjithë ndanin të njëjtin vizion për Shqipërinë: vizionin e një shteti të lirë, të pavarur e demokratik. E ndaj, ata burra dhe familje të mëdha shqiptare kanë nderimin dhe mirënjohjen tonë të përjetshme. Rruga jonë për ndërtimin e shtetit të së drejtës dhe demokracisë funksionale është një rrugë pa kthim, ashtu si angazhimi ynë për paqen dhe dialogun”, u shpreh Begaj, raporton Klankosova.tv.

    Ai përmendi të arriturat e Shqipërisë ndër vite, siç është anëtarësimi në NATO, përfaqësimin në OKB, si anëtare jo e përhershme në Këshillin e Sigurimit dhe e angazhuar në forume globale.

    Po ashtu, Begaj tha se “vendi ynë është krenar për miqësinë dhe aleancën strategjike me SHBA, vendet e Bashkimit Evropian, Mbretërinë e Bashkuar dhe të gjitha vendet mike dhe aleate në botë”.

    Fillimi i negociatave për anëtarësim në Bashkimin Evropian, sipas kreut të shtetit shqiptar, është një arritje historike, që njeh përkushtimin ndër vite të institucioneve shqiptare.

    “Shqipëria, pas një vlerësimi historik, do të mirëpresë liderët Evropianë në Samitin BE-Ballkani Perëndimor. Ky është një mesazh inkurajimi për të ardhmen evropiane të shqiptarëve në Shqipëri dhe në të gjitha vendet e rajonit. Edhe pse të ndarë në disa shtete, faktori shqiptar në Shqipëri, Kosovë, Maqedoni e Veriut, Mal të Zi, Luginën e Preshevës e diasporë ka qenë, është, dhe do të jetë i bashkuar, në mbështetje të destinacionit tonë të përbashkët në familjen Euro-Atlantike. Vizioni mbarë-popullor për të qenë pjesë e familjes evropiane duhet të jetë premisa dhe shtysa për bashkëpunim konstruktiv, politik e parlamentar, për vijimin e reformave dhe përmirësimin e jetës së qytetarëve”, deklaroi ai.

    Shqipëria, tha ai, ka dënuar pa asnjë hezitim agresionin e papërligjur të Rusisë ndaj Ukrainës dhe luftën, që vijon të shkaktojë pasoja të shumta për të gjitha vendet.

    Ndërkohë, ai tha se Shqipëria dhe të gjithë shqiptarët duhet të punojnë në rritjen e numrit të njohjeve të shtetësisë së Kosovës, por edhe për liberalizim të vizave për qytetarët e saj.

    “Ndryshimi i kontekstit rajonal, evropian dhe global të sigurisë, kriza ekonomike, energjetike, sulmet kibernetike kanë nxjerrë në pah nevojën e shtuar për bashkëpunim konstruktiv, politik e parlamentar, për çështje të sigurisë kombëtare dhe në bashkërendim të ngushtë me aleatët tanë. Ky bashkëpunim është i nevojshëm edhe për lartësimin e Kosovës, si një realitet i pakthyeshëm. Na duhet të kontribuojmë më tej për njohjen e shtetit të Kosovës, liberalizimin e vizave për qytetarët e saj, si dhe të vazhdojmë të mbështesim përparimin e dialogut politik me Serbinë”, potencoi kreu i shtetit shqiptar, Bajram Begaj.

    Në përfundim të fjalës së tij, presidenti shqiptar tha se “historia e shqiptarëve është një histori që na bën krenarë” dhe se “ajo është historia e një kombi që nuk bën kompromis me asgjë dhe askënd që cenon lirinë, dinjitetin dhe integritetin tonë kombëtar”.

    “Ismail Qemali dhe Isa Boletini, si dy figura qendrore të atdhedashurisë së pakufishme, na kujtojnë sot e çdo ditë mesazhin e unitetit kombëtar, të zemrës shqiptare, që rreh njëlloj si në Jug dhe në Veri, si në Vlorë edhe në Prishtinë. Secilit prej nesh këtu i jepet mundësia për të lënë gjurmën e vet në historinë tonë dhe për të lartësuar vlerat, mbi të cilat është ndërtuar kombi ynë. E sotmja, mbi të gjitha, duhet të jetë një ditë reflektimi për ne, për misionin tonë dhe për trashëgiminë që do lëmë pas. Le të mendojmë të gjithë për këtë. Falënderime të përzemërta dhe urimet më të ngrohta për të gjithë shqiptarët, arbëreshët dhe miqtë tanë kudo janë! Gëzuar 110 vjetorin e Pavarësisë”, përfundoi fjalën e tij presidenti shqiptar, Bajram Begaj. /Klankosova.tv/

    Njoftimet nga KEDS për punimet në rrjet
    Nga Rubrika
    Bota/Rajoni19 Mars 2024
    Ministri i Mbrojtjes i Shteteve të Bashkuara, Lloyd Austin, tha sot, në takimin e Grupit të Kontaktit për Mbrojtjen e Ukrainës, se...
    Bota/Rajoni19 Mars 2024
    Gjashtë persona humbën jetën në orët e para të mëngjesit të sotëm, duke përfshirë dy policë spanjollë, pranë Seviljes, kur një kamion...
    Bota/Rajoni19 Mars 2024
    Kryetari i bashkisë së Nju Jorkut, Eric Adams po përballet me akuza tronditëse për sulm seksual nga një ish kolege, e cila...
    Të tjera
    Lajme19 Mars 2024
    Kryetari i Komisionit për Punë të Jashtme në Bundestagun gjerman Michael Roth, ka thënë se presidenti i Serbisë Aleksandër Vuçiq ka keqkuptuar,...
    Lajme19 Mars 2024
    Kryeministri Albin Kurti ka qenë i ftuar në një podcast “The Rest is Politics” me Rory Stewart dhe Alastair Campbell. Steëart një...
    Lajme19 Mars 2024
    Është shtyrë për në mbledhjen e radhës raportimi i ministres së Industrisë, Ndërmarrësisë dhe Tregtisë, Rozeta Hajdari, lidhur me realizimin e projekteve...
    Lajme19 Mars 2024
    Deputeti i Aleancës për Ardhmërinë e Kosovës, Pal Lekaj, ka akuzuar ministren e Industrisë, Ndërmarrësisë dhe Tregtisë, Rozeta Hajdari, për centralizim, duke...
    Lajme19 Mars 2024
    Kosova do të përfaqësohet për herë të parë në Lojërat Paralimpike “Paris 2024”, ndaj presidentja Vjosa Osmani e ka cilësuar këtë moment...
    Sport19 Mars 2024
    Kombëtarja e Italisë është grumbulluar për dy miqësoret e këtij muaji që do t’i zhvillojë kundër Venezuelës dhe Ekuadorit. E në konferencë...

    FrontOnline, © 2024 Të gjitha të drejtat e rezervuara.