Artistja shqiptare me famë ndërkombëtare, Bebe Rexha, ka rishpërndarë në Instagramin e saj një video përmbledhëse nga paraqitja e saj spektakolare në festivalin “Sunny Hill”.
Videoja, e cila vjen si një ‘aftermovie’, kap momentet më të veçanta të performancës së saj në natën e parë të festivalit, që u mbajt në Prishtinë.
Kjo paraqitje e shënoi herën e parë që Bebe Rexha, një artiste e rangut ndërkombëtar, pati mundësinë të vizitojë Kosovën.
Për shumë fansa shqiptarë, ky ishte një moment emocionues dhe i shumëpritur, duke parë një prej yjeve më të mëdha të muzikës pop në botë të performojë në skenën vendore.
Videoja e rishpërndarë nga Bebe Rexha në Instagram ka marrë mijëra pëlqime dhe komente, ku fansat e saj shprehin entuziazmin dhe mirënjohjen për këtë moment historik.
Pamjet përfshijnë emocionet e turmës, efektet e dritave dhe energjinë e jashtëzakonshme të këngëtares gjatë performancës së saj.
Sunny Hill Festival, i cili është një nga festivalet më të mëdha të muzikës në rajon, ka sjellë së bashku disa nga emrat më të njohur të muzikës botërore, duke krijuar një platformë të rëndësishme për artistët shqiptarë dhe të huaj. Paraqitja e Bebe Rexhës në këtë festival është një dëshmi e rëndësisë dhe ndikimit që ky event ka në promovimin e kulturës dhe muzikës shqiptare në nivel ndërkombëtar. /Telegrafi/
