Basri Sejdiu thotë se do të rikthehet në krye të SHSKUK-së

Me 6 korrik të këtij viti nga Bordi i Përgjithshëm i Shërbimit Spitalor, Klinik dhe Universitar të Kosovës (SHSKUK), është shkarkuar nga pozita e drejtorit të SHSKUK-së, Basri Sejdiu.

Arsyet që i ka dhënë Bordi për shkarkimin e Sejdiut kanë qenë të lidhura me raportin e auditorit të brendshëm, që ka identifikuar shkelje të shumta përfshirë keq menaxhimin dhe performancën e dobët.

Por ndryshe nga Bordi, ka vendosur Inspektorati i Punës.

Nga ky institucion është konstatuar se arsyet e Bordit për shkarkimin e Sejdiut kanë qenë të pabaza.

Aty është theksuar se proceset e përshkruara në arsyetimin e vendimit të bordit të SHSKUK për shkarkim, nuk janë kompetencë e drejtorit të përgjithshëm.

Kështu nga ky inspektorat është urdhëruar rikthimi i menjëhershëm i Basri Sejdiut në krye të SHSKUK-së.

Por i njëjti ende nuk ka filluar punën.

Sejdiu në një prononcim për Front Online, ka thënë që Bordi i SHSKUK-së, ende nuk ka marrë vendim për kthimin e tij në punë.

“Po mendoj që së shpejti do të filloj punën. Po pres vendimin që duhet të marr Bordi i Përgjithshëm i SHSKUK-së. Kështu që nga Inspektorati është bërë e qartë. Vendimi është obligativ dhe duhet që të zbatohet nga ta”, ka deklaruar ai për Front Online.

Megjithatë Sejdiu, përmendi edhe mundësinë që Bordi të bëj ankesë për vendimin e Inspektoratit të Punës.

“Ata mund të bëjnë ankesë por nuk e di se cilët do të jenë hapat e tyre të mëtutjeshëm por pres rikthimin. Është një vendim shumë i qartë nga Inspektorati i Punës dhe vetëm po e pres kthimin”, ka thënë tutje Sejdiu.

Përndryshe, detyrën e drejtorit të përgjithshëm të SHSKUK-së, që nga 6 korriku është duke e ushtruar infektologu Valbon Krasniqi.

“Petrol Company” në natën e “Kurban Bajramit” e bën me shtëpi të re familjen nga Skenderaj

Sponsoruar