Ministri i Haxhit të Arabisë Saudite ka thënë se numri i pelegrinëve që do të mund të marrin pjesë në Haxh këtë vit do të kufizohej në rreth 1.000 qytetarë vendas, për të parandaluar përhapjen e coronavirusit të ri.

Sipas mediave të huaja, përcjell Telegrafi, pelegrinët që vijnë nga jashtë do të ndalohen këtë vit dhe ministria do të zbatojë një kriter të rreptë shëndetësor për të zgjedhur haxhilerët që mund të marrin pjesë në pelegrinazh.

Madje, siç bëhet e ditur më tej, Mohamed Benten ka bërë të ditur se pjesëmarrja në pelegrinazh nuk do të jetë e lejuar as për banorët vendas, mbi 65 vjeç.

Ndryshe, Arabia Saudite ka regjistruar më shumë se 161,000 infeksione me COVID-19 me mbi 1.300 vdekje, pas një rritje të rasteve të reja në dy javët e fundit.

Ndryshe, gjatë ditës, edhe Bashkësia Islame e Kosovës, ka njoftuar të gjithë qytetarët e Kosovës se Drejtoria e Haxhit, nuk do të kryej asnjë procedurë në lidhje me kryerjen e Haxhit për këtë vit, duke respektuar vendimin e Ministrisë Saudite të Haxhit dhe Umres.

Një vendim i BIK-ut vjen pas vendimit nga Ministria Saudite e Haxhit dhe Umres, e cila ka marrë vendim për anulimin e Haxhit për vitin 2020.

“Duke pasur për bazë se numri i personave të vdekur ka arritur në gjysmë milioni, ndërsa numri i të infektuarve ka arritur në më shumë se 7 milionë persona, autoritetet saudite kanë vendosur që Haxhi këtë vit të kryhet vetëm nga personat brenda territorit të Arabisë Saudite”, thuhet ndër tjerash në njoftimin e BIK-ut.

“Lusim Allahun e Madhëruar që të gjithë atyre personave që kanë pasur nijetin për kryerjen e Haxhit, t’ua pranoj si adhurim të kryer, ndërsa të na mundësohet që Haxhin ta kryejmë vitin e ardhshëm!”, thuhej në fund të njoftimit të Bashkësisë Islame të Kosovës.