Imun nuk do të jetë askush.

As ata që bëjnë ekonomi në të zezën në Kosovë.

Me fjalë të tjera, të gjithë ata që nga paslufta kanë mbledhur mbi 5 mijë euro pasuri dhe nuk mund ta dëshmojnë origjinën e saj, do të jenë nën llupën e ligjit Anti-Mafia.

Udhën për hartimin i tij e ka të çelur Ministria e Drejtësisë, pasi koncept-dokumenti i saj, u votua në plotni nga kabineti qeveritar Kurti II.

Meqë akoma s`ka marrë formën përfundimtare, në Odën Ekonomike të Kosovës, nuk pranojnë të lëshohen në deklarata rreth ligjit.

Sidoqoftë kryetari i saj, Berat Rukiqi, mirëpret çdo nismë ligjore që e lufton ekonominë joformale në Kosovë, e që vlerësohet të jetë mbi 20 %.

“Ajo që ne kërkojmë në çdo ligj është që ligji ta mbrojë konkurrencën në treg, normal që është shumë me rëndësi synimi me luftu joformalitetin, por kjo të bëhet brenda dispozitave të Kushtetutës që e kemi”, tha ai për Front Online.

Të ngutshëm hartimin e ligjit anti-mafia e sheh ekonomisti, Mustafë Kadriaj.

Sipas tij, bizneset duhet të hetohen nga organet kompetente e jo nga politika.

“Duhet të kalojë kjo çështje, hetimi i bizneseve, në mënyrë të pavarur nga Gjykata dhe Prokuroria, e më se paku të merret politika me këtë çështja, sepse në momentin që merret politika me një farë mënyre bëhet subjektiv”, u shpreh ai për Front Online.

Ekonomia joformale është njëra prej barrierave të të bërit biznes në Kosovë./Front Online/