Një person i armatosur me bazukë është parë bashkë me persona të tjerë të armatosur me armë të gjata, të cilët kishin dalë për t’i mbrojtur protestuesit në Missouri të Shteteve të Bashkuara pasi një person me ngjytë u sulmua nga një polic.

Burrat e armatosur rëndë, që e quajnë veten Grupi për Mbrojtjen e Popullit, marshuan bashkë me protestuesit kundër policisë në Missouri të martën, shkruan “Daily Mail”.

Reagimi i tyre erdhi pasi një hetues policor nga qyteza Florissant u akuzua për sulm dhe akt të armatosur kriminal.

Hetuesi Joshua Smith u kap nga kamerat duke e goditur me veturë një burrë 20-vjeçar para se ta rrahte atë.

Personat e armatosur i ngritën grushtet në shenjë solidarizimi me protestuesit dhe disa prej tyre u panë duke biseduar me policët pranë stacionit policor.

Shtetet e Bashkuara shpesh janë kritikuar për ligjet e buta të armëmbajtjes.