“Unë kam përmend një rast që janë privatizuar 50 hektarë për 5 mijë euro. Pra, 5 mijë ari tokë e Kosovës janë shitë për 5 mijë euro që i bie 1 euro ari”.

Kështu ka deklaruar gjatë ditës së djeshme ish-kreu i Bordit të AKP-së, Blerim Rexha, në Komisionin Hetimor Parlamentar lidhur me procesin e privatizimit në Kosovë.

Mbase jo kaq lirë.

Megjithatë në Kosovë, ekzistojnë edhe raste tjera me bollëk, kur  toka e shtetit u privatizua me një çmim të ulët krejt përtoke.

Vetëm brenda periudhës 2004 – 2014, një ari tokë, u shit me çmimi mesatar prej 34 euro, kurse një hektar me një çmim mesatar prej 3,400 euro.

Kështu, të dhënat e Agjencisë Kosovare te Privatizimit, tregojnë se për rreth 30 mijë hektarë tokë  ata inkasuan rreth 99 milionë euro, shkruan Front Online.

Pasojat nga shitjet kaq të lira, sipas ekspertëve të ekonomisë, janë të shumta.

“Besoj që shumë më e madhe sesa vet dëmet e luftës ka qenë procesi i privatizimit, një proces i cili është kryer në një mënyrë më të egër. Është dëmtuar Kosova politikisht, ekonomikisht, është varrosur aspekti social. Janë krijuar tajkun që e kanë shtetin në dorë”, tha për Front Online Gerxhaliu.

Ekonomisti SafetGerxhaliu thotë se këto dëme janë të pakompensueshme.

E fajtoret, siç thotë ai, veçse dihen.

“Gjyqësia ne Kosove është kapur. Është një dëshmi se politikanët kosovarë janë të përfshirë në këto procese. Kjo dëshmon involvimin e partive politike në krim dhe korrupsion. Kjo e dëshmon se qoftë nëpër borde të rëndësisë strategjike kanë vendosur njerëz servile që nuk kanë menduar për shtet e për ardhmëri, por vetëm pasuri të grupeve të caktuara, u shpreh ai për Front Online.

Në periudhën 10 vjeçare 2004 – 2014, më së shumti privatizime janë bërë në Pejë, pastaj në Prizren e Prishtinë.

Shitje ka pasur edhe në Gjilan e Mitrovicë. /FRONT ONLINE