Trajneri Xavi Hernandez, foli për mediat të martën përpara ndeshjes ku tha se ai shpreson që skuadra e tij të tregojë përmirësime të mëdha në krahasim nga sezoni zhgënjyes në Ligën e Kampionëve edicionin e kaluar.

“Ne kemi lojtarë më shumë përvojë në Ligën e Kampionëve, të cilët tashmë kanë fituar tituj këtu. Jemi forcuar mirë dhe në këtë kompeticion shpresojmë të jemi në nivelin që duhet të jetë Barcelona. Kjo ndeshje është një skenar ideal për ta vërtetuar këtë”, ka thënë fillimisht Xavi.

“Unë mendoj se, në përgjithësi, ne duhet të reflektojmë dhe t’i japim fund formës tonë të dobët si mysafir (në Ligën e Kampionëve). Ne kemi vuajtur në këtë garë, por kemi lojtarë që kanë fituar shumë, si Gundogan dhe Cancelo, kështu që duhet të mendojmë pozitivisht”, u shpreh tekniku spanjoll.

Tutje, Xavi e vlerësoi ndeshjen ndaj Portos si jo të lehtë dhe kërkoi nga futbollistët e tij që të shfaqin karakterin e tyre.

“Ne duhet të konkurrojmë dhe të bëjmë një hap përpara përmes lojës dhe të imponojmë personalitetin tonë. Nuk do të jetë e lehtë kundër Portos, por ne e kemi nisur mirë. Ne jemi liderët e grupit”, është shprehur Xavi.

Xavi foli edhe për Fermin Lopez, i cili tashmë mund të cilësohet si lojtar i ekipit të parë këtë sezon. Xavi shprehet i kënaqur me paraqitjet e 20-vjeçarit deri më tani.

“Ai është pjesë e ekipit të parë. Më pëlqen shumë dhe ka qenë një surprizë për të gjithë ne. Mendoj se ai mund të na ndihmojë shumë, ka shumë cilësi dhe besoj se mund të jetë lojtar i Barcelonës për shumë vjet. Ai është gati të luajë rolin e tij”, përfundoi 43-vjeçari.

Barcelona e di se fitorja kundër Portos do të jetë shumë e rëndësishme për shpresat e tyre për të kryesuar grupin, gjë që do të përmirësonte shanset e tyre për një sezon të suksesshëm në këtë edicion të ri të  Ligës së Kampionëve. Tani, mbetet për t’u parë nëse blaugranët do t’i sigurojnë të tre pikët në udhëtim./Telegrafi/