Kryetari I Komunës së Prishtinës, Shpend Ahmeti, gjatë një emisioni televiziv ka folur për taksen prej 10 euro e cila është propozuar ditë më parë, për qytetarët të cilët hyjnë në Prishtinë.
Ai ka thënë se nuk do të ketë rampa në hyrje të qytetit, por ata që dëshirojnë të hyjnë në qendër me vetura do të paguajnë më shumë.
Kjo sipas Ahmetit, do të ndodhë pasi që trafiku po e ndotë ajrin.
“Nuk kemi të bëjmë me rampa, nuk do të ketë rampa në hyrje të Prishtinës, reagimi i qytetarëve ka qenë i mirë. Dy çështje i kemi që ndikojnë në ndotjen e ajrit, ne e kemi një pozitë të keqe dhe kemi ndotje, ngrohja individuale dhe trafiku janë ndotësit më të mëdhenj të ajrit në Prishtinë, brenda 5 viteve nuk do të ketë qytetarë që do të ngrohen me qymyr. Hyrja në qendër të qytetit me makina do të kushtoj më shtrejt, ky ka qenë propozimi”, tha Ahmeti.