Ndonëse kishte paralajmëruar që në fillim të kësaj jave do t’a bëjë publike ose jo kandidaturën për kryetar të LDK-së, Lutfi Haziri ende nuk e ka marrë një vendim të tillë, shkruan Front Online.
Haziri në një prononcim për Front Online ka thënë se është në konsultime të brendshme me partinë.
“Nuk kam deklaruar se do të tregojë në fillim të javës, kam thënë gjatë kësaj jave, java është e gjatë, nuk kam ende vendim, jam në konsultime të brendshme”, ka thënë Haziri
Ndërsa, i pyetur se a e ka përkrahjen e LDK-së për t’u zgjedhur kryetar i kësaj të fundit, Haziri është shprehur se Lidhja Demokratike e Kosovës ia jep përkrahjen çdo kandidati.
“LDK-ja ia jep përkrahjen çdo kandidati që del, tash jemi më shumë se nja, duhet me pa në Kuvend kush e merr përkrahjen”, ka thënë ai, për Front Online.
Ditë më parë nënkryetari i LDK-së, Lutfi Haziri në një emision televiziv ka deklaruar se në fillim të kësaj jave do të bëjë publike se a do të kandidojë për kryetar të LDK-së, apo jo.
“Në fillim të javës së ardhshme do ta bëjë me dije. Neve na kanë bërë edhe ashtu pretendent edhe struktura edhe mediat edhe të tjerët”, është shprehur Haziri për Front Online
Lidhja Demokratike e Kosovës më 14 mars do të mbajë Kuvendin Zgjedhor në të cilin pritet të zgjidhet kryetari i ri i kësaj partie dhe kryesia e re, pas dorëheqjes së Isa Mustafës.
Si arsye e dorëheqjes ka qenë humbja e thellë e kësaj partie në zgjedhjet e 14 shkurtit./Front Online/
