Mbi 7 mijë pako me vota nga diaspora kanë arritur tashmë në Kosovë, prej të cilave mbi 2 mijë janë dërguar me postë të shpejt(DHL) dhe më shumë se 5 mijë të tjera janë dërguar përmes Postës së Kosovës.
Kështu ka bërë të ditur përmes një postimi organizata GERMIN.
“GERMIN, përmes vëzhguesve të akredituar në Komisionin Qendror të Zgjedhjeve (KQZ), është duke vëzhguar procesin e arritjes dhe pranimit të pakove me fletëvotime nga jashtë nga KQZ. Sot (9 shkurt 2021) kanë arritur gjithsej 7,612 pako, prej të cilave 2,157 përmes postës së shpejtë “DHL Express” dhe 5,455 nga shërbimet tjera postare përmes Postës së Kosovës (kutia postare 351)”, thuhet në njoftimin e tyre.
Ndryshe, përmes Avokatit të Popullit, organizata GERMIN, po synon që të hap një rast në Gjykatën Kushtetuese për parregullsitë në lidhje me votat e diasporës gjatë zgjedhjeve të parakohshme parlamentare të cilat do të mbahen më 14 shkurt 2021.
Lirim Krasniqi, nga kjo organizatë gjatë një interviste për “Përballje” me kryeredaktorin, Muhamet Hajrullahu në Telegrafi.com, kishte njoftuar se janë duke u përgatitur të lansojnë një email të veçantë ku përmes një formulari të gjithë votuesit jashtë vendit do të mund të paraqesin ankesat e tyre në lidhje me procesin e zgjedhjeve.
Ky email tashmë është publik për qytetarët të cilët kanë aplikuar për regjistrim për votim nga jashtë Kosovës dhe besojnë që i plotësojnë të gjitha kriteret juridike për të votuar, por aplikacioni i tyrë është refuzuar nga Komisioni Qendror i Zgjedhjeve (KQZ).
“Në bashkëpunim me zyrën ligjore “Hodaj & Partners”, ne do t’i mbledhim të gjitha dëshmitë për cënimin e të drejtës së votës ndaj qytetarëve që jetojnë jashtë vendit dhe do të paraqesim një rast pranë Avokatit të Popullit, përmes së cilit synojnë të ngrisim çështjen në Gjykatën Kushtetuese të Republikës së Kosovës”, thuhet në njoftimin e GERMIN.
https://www.facebook.com/GerminKS/photos/a.1774118032862269/2899949680279093/?type=3
https://www.facebook.com/GerminKS/posts/2900025923604802
