Me 26 shkurt të vitit 1998, në Abri të Epërme, forcat serbe vranë dhe masakruan 23 shqiptarë, që i përkisnin të së njëjtës familje.
Memli Krasniqi, kryetar i PDK-së, ka thënë se kjo tragjedi nuk mori kurrë dënimin e merituar.
“Me 26 shkurt të vitit 1998, Dituria ishte gjashtë javëshe. Valmiri ishte dy vjeç. Luljeta ishte shtatzënë, duke pritur një Malësor ose Malësore që të vinte në jetë. Fazliu ishte 94 vjeç”.
“Dituria nuk mbijetoi që të festonte ditëlindjen e parë. Valmiri nuk u regjistrua kurrë në shkollë. Malësori ose Malësorja nuk erdhën asnjëherë në jetë. Fazliu nuk vdiq në shtrat i rrethuar nga më të dashurit e tij”.
“Jetët e këtyre të katërve, përshirë 19 anëtarëve tjerë të familjes Deliu, u prenë tragjikisht në mëngjesin e 26 shkurtit në Abri të Epërme nga forcat kriminale serbe”.
“Kjo është historia e Kosovës. Kjo është e vërteta e Serbisë. Kjo është dhembja me të cilën janë detyruar të jetojnë familja Deliu dhe të afërmit e tyre. Një krim që tejkalon gjithçka që fjalët mund të përshkruajnë. Një tragjedi që nuk mori kurrë dënimin e merituar. Një padrejtësi e përjetshme, për të cilin nuk guxojmë të ndalemi asnjëherë së kërkuari drejtësi”, thotë Krasniqi në një postim në Facebook.
Ai tha se historia jonë nuk do të harrojë asnjëherë sesa me vlerë është liria që gëzojmë sot dhe sa e vështirë ishte rruga që kaloi populli ynë deri në çlirim, teksa kujtoi edhe tre heronjtë e UÇK-së që tanë po atë ditë në altarin e lirisë, Vesel Demaku, Valdet Xhemajli e Afrim Hajdaraj.
“Lavdi e përjetshme martirëve dhe dëshmorëve të Kosovës”, përfundoi Memli Krasniqi.
