Ekonomi

Formalizimi i punëtorëve/ Në ATK regjistrohen mbi 2 mijë punëtorë

Formalizimi i punëtorëve/ Në ATK regjistrohen mbi 2 mijë punëtorë
18:15 | 10 Maj 2022

Punëtorët e sektorit privat në Kosovë vazhdojnë të përballen me sfida në vendet e tyre të punës.

Shumë nga ta punojnë duke mos u regjistruar nga punëdhënësi, e ka edhe prej tyre që edhe pse janë të regjistruar nuk u paguhen kontributet pensionale, shkruan FrontOnline.

E, si shkas i kësaj, që nga dhjetori i vitit të kaluar Administrata Tatimore e Kosovës, ka hartuar Planin e  Veprimit për “Përmirësimin e përmbushjes për Punësimin jo-formal”, ku përmes këtij plani do të kryejë aktivitete intensive me qëllim të identifikimit të personave, të cilët nuk përmbushin detyrimet e tyre.

Që nga ajo kohë numër jo i vogël i punëtorëve janë regjistruar në këtë institucion, për mosregjistrim dhe mos pagesë të kontributeve nga punëdhënësi.

Nga Administrata Tatimore e Kosovës kanë treguar për FrontOnline, se numri i punëtorëve të formalizuar kalon shifrën e 2 mijëshit.

“Vegla për verifikim është mekanizëm i krijuar në kuadër të projektit për formalizim të punësimit, ku pa dyshim rezultat në rritjen e numrit të formalizuar kanë dhënë edhe raportimet përmes kësaj vegle. Në total që kur ka fillua projekti në fjalë janë formalizuar 2,168 punëtor”, ka deklaruar për FrontOnline, zëdhënësja e ATK-së, Valentina Bytyqi-Sefa.

Në këtë shifër hyjnë edhe 160 punëtorë të cilët kanë denoncuar punëdhënësit e tyre për mos regjistrim.

“Jemi duke zbatuar Projektin për Formalizmin e Punësimit, ku po ashtu kemi lancuar në dhjetor edhe veglën për verifikim të punëtorëve, e cila njëkohësisht u mundëson edhe denoncimin e punëdhënësit në rastet kur punëtori verifikon vetën si i pa deklaruar. Numri i denoncimeve të punëtoreve për punëdhënësin përmes veglës elektronike nga dhjetori deri më tani është 160”, është shprehur Bytyqi-Sefa për FrontOnline.

Qeveria e Kosovës, ditë më parë ka marrë vendim që të subvencionojë punëtorët e sektorit privat me nga 100 euro.

Aplikimi për këto shtesa është hapur më 21 prill dhe do të vazhdojë deri më 20 maj./FrontOnline

Prince Coffee House tani edhe në Vjenë të Austrisë

Të tjera