Në 22 vjetorin e masakrës së Reçakut, ushtruesja e detyrës së presidentit, Vjosa Osmani sëbashku me liderin e Lëvizjes Vetëvendosje, Albin Kurti kanë bërë homazhe në kompleksin memorial në këtë fshat për të nderuar viktimat e gjenocidit serb.
Dy liderët që edhe garojnë në një listë të përbashkët në zgjedhjet e 14 shkurtit kërkuan vendosjen e drejtësisë për masakrën e Reçakut.
U.D e presidentit, Vjosa Osmani tha se për këto krime nuk është kurrë vonë për t’ia paraqit botës, pasi Serbia ende ka një mendje gjenocidale.
“Masakra e Reçakut është ndër dëshmitë më autentike të gjenocidit serb në Kosovë. Në fakt është vendi ku përfundimisht u dëshmua qëllimi i Serbisë për shfarosjen e popullit shqiptar. Prandaj nga këtu, por edhe duke nderuar gjithë martirët dhe dëshmorët anë e kënd Kosovës duhet me zë te lartë të themi këtë të vërtet duke kërkuar drejtësi për të gjithë ata që ishin viktima civile dhe gjithë të tjerët që rënë që ne të gëzojmë lirinë tonë”, tha ajo.
Ndërsa, ish kryeministri Albin Kurti duke kërkuar drejtësi tha se jo vetëm urdhërdhënësit, por edhe ekzekutorët e kësaj masakre dihen.
“Jo vetëm urdhërdhënësit, por edhe ekzekutorët dihen me emra në shumë raste, jo vetëm në masakrën e Reçakut dhe është detyrë e shtetit tonë, por edhe faktorëve ndërkombëtar që t’i ndjekim dhe gjykojmë e t’i dënojmë ata. Meqenëse nuk mund të ketë paqe të qëndrueshme përderisa nuk ka drejtësi e cila sjell rehabilitim për viktimat dhe dënim për kriminelët”, tha ai.