Një postim në rrjetin social Facebook i kryeministrit në detyrë Avdullah Hoti ku shihet në një tubim në një lagje të Prishtinës i ka kushtuar LDK-së 2000 euro, pasi janë evidentuar se janë shkelur masat anti-COVID.

Drejtori i Inspeksioni i Komunës së Prishtinës, Adonis Tahiri, tha se askush nuk është mbi ligjin dhe se është e domosdoshme zbatimi i masave.

“Askush mbi ligjin! Zbatimi masave për parandalimin e shpërndarjes së virusit, është i domosdoshëm. Shkeljet sanksionohen në bazë të Ligjit për parandalimin dhe luftimin e pandemisë COVID-19 në territorin e Republikës së Kosovës – neni 25, paragrafi 1”, tha ai.

Tahiri ka ftuar subjektet politike që t’i respektojnë vendimet të cilat vetë i kanë votuar.

“Iu bëjmë thirrjeve subjekteve politike që të respektojnë ligjet dhe vendimet që vet i kanë votuar. Në të kundërtën, gjobat iu shkojnë në zyrat qendrore të partive, për secilin tubim në Prishtinë”, vijoi ai.